Мах фæцардыстæм фылдæр

Мах фæцардыстæм фылдæр
Раздел: Парк "Z" / Зармон

Мах арæх фехъусæм, фæкæсæм:

Фæцардис ахæм лæг æнус.

Æмæ нæм уæд цыма фæкæсы

Нæхи уæззау цардвæндаг цъус.

Æнус æмæ æрдæджы карæн

Уыдис Агор, Мислим, æндæр.

Фæлæ куы уаид азтæн барæн,

Уæд мах фæцардысæм фылдæр.

Фыдызнаг нæм цæттæйæ дардта

Фæсвæд, æргом æдзух йæ кард.

Мах бонгай нæ, уысмгай нымадтам

Цæргæ-цæрæнбонты нæ цард...

Æрымысæм-ма тохты азтæ, -

Нывондæн хастам мах нæ сæр.

Æнусты талынгад ныссастам,

Ыссыгъд Октябры цæхæр.

Ыстæй - фæллойадон ыстæртæ,

Нæ дуг нæма уыдис æрвонг...

Ысурс ысты æвзонгæй сæртæ,

Фæлæ нæ цард та кодта ног.

Ыстæй ыстырдæр хæст уыд ахæм, -

Нæ цард тæрæзтыл æвæрд уыд.

Мæлæт æргомæй рацыд махмæ

Æмæ йын уднывæндтæ хъуыд...

Æрсдонау раивылд дывыдон,

Уыд дуне, тар мигъау, фыдох.

Мæрдтæй ыздæхтыстæм æрвылбон,

Мæлæтимæ та ногæй - тох...

Æмæ фæтыхыстæм мæлæтыл,

Æниу куыд фæрæзтам быхсын!

Кæм уыд æнцой? - ныр та нæ мæт уыд

Фыдхæсты тугæрхæм ныхсын...

Йе, афтæ царды уаргъ фæхастам,

Лæг ма цы федтаид фыддæр!

Уæзæй куы аргъ кæниккам азтæн,

Уæд махæй чи фæцард фылдæр?!.

Козаты Исидор

Разместил: usima1 | Версия для печати |Просмотров: 532 | Комментариев: 1 |

#1 Написал: usima1 (23 октября 2017 20:50)

Откуда:

Комментариев: 3382

Публикаций: 1197

Статус: Пользователь offline

Уæзæй куы аргъ кæниккам азтæн,

Уæд махæй чи фæцард фылдæр?!.

Абон ашрамы Ирыстоны чи зайы, уыцы зайæгойты нæмттæн рæстæг рауæлдай кодтам. Уæллæй, хорз вæййы ног истытæ базонын).

Иннæ хатт бадзырдтам Бæтæйы фырттыл лæмбынæг адзурынмæ. Æмæ уал, зæгъын, æрмæг бацæттæ кæнон иннæ хаттмæ, æндæра мын Маэстро дыууæ куы нывæра журналы, уæд аив нæу).

Хуссары театры цы спектакл æвæрдтой, уый Хъаирты Валодяйы пьесæмæ гæсгæ æвæрд æрцыд, фæлæ ма, гуглмæ гæсгæ, ахæм пьесæ ныффыста Калоты Хазби дæр. Стæй Санаты Уарийы таурæгъмæ дæр ногæй æркæсын хъæуы æмæ, кæй зæгъын æй хъæуы, Мамсыраты Дæбейы "Бæтæйы фырттæ" дæр рохуаты ма ныууадзæм. Чи зоны, уæдмæ ма исты разына ацы темæйыл.

Хазбийыон фæрсын райдыдтон, Дæбе дæр мæм куыннæ уыдзæн библиотекæйы, сом æй рацагурдзынæн, фæлæ Хъаирты Валодяйы версийæн дзуапп нæ дæттын. Нæ хъуыды кæнын ахæм чиныг. Фæлæ бацагурдзыстæм искуы. Кæд разынид.

Бæттæйы фыртты агургæйæ мæ цæст рауардта дыууæ чиныгы - Хуссар Ирыстоны театр (Цхинвал, 1968) æмæ Зарджыты зарæг (Цхинвал, 1977). Дыггаг у Октябры 60-м юбилеймæ уагъд æмæ фылдæр у Ленин æмæ партийы цытæн. Фæлæ дзы ыссардтон тынг хорз рæнхъытæ дæр. Сæ иу Исидоры æмдзæвгæ - "Мах фæцардыстæм фылдæр". Табуафси.

--------------------

Парк Z знает цену прекрасному.

Зарегистрирован: 14.11.2011 ICQ: {icq}

Информация

Посетители, находящиеся в группе Гости, не могут оставлять комментарии к данной публикации.